Avokati i Popullit, Naim Qelaj, ka shprehur shqetësime lidhur me mënyrën se si po zhvillohet procesi gjyqësore ndaj ish-krerëve të Ushtrisë Çlirimtare të Kosovës në Hagë, tha se shteti i Kosovës nuk ka ndërmarrë hapat e nevojshëm për të siguruar një proces të drejtë, të paanshëm dhe të mbikëqyrur siç duhet.
Qelaj nuk deshi të flasë për mbështetjen financiare nga buxheti i shtetit për mbrojtjen e Hashim Thaçit, Kadri Veselit, Jakup Krasniqit dhe Rexhep Selimit, por vuri në pah monitorimin e munguar të gjykimit të tyre.
“Nuk duhet të flasim për mbështetje. E, para që duhet të bëjmë është të sigurojmë proces të drejtë dhe të paanshëm. Ndoshta këtu Kosova nuk ka bërë mjaftueshëm, sepse ka qenë e domosdoshme që kjo gjykatë të monitorohet prej një autoriteti i cili është jopolitik, joinstitucional”, tha Qelaj.
Ai tha se shqetësimet e qytetarëve për ecurinë e gjykimit në Hagë janë të arsyeshme, për shkak të problemeve me transparencën, redaktimet e shumta dhe përdorimin e provave të dyshimta.
“Publikohen seanca të redaktuara, jepen dokumente dhe prova të redaktuara, ka probleme të përkthimeve dhe përdorimit të gjuhës. Të gjitha këto janë probleme që qytetari i Republikës së Kosovës, në emër të së cilës operon ajo gjykatë, dilemat nëse kjo gjykatë është me të vërtetë në funksionin e vet për të garantuar respektim të të drejtave të njeriut të të akuzuarve, të dëmtuarve dhe dëshmitarëve në procedurën gjyqësore”, tha ai për eo.
Sipas Qelajt, është koha që edhe Këshilli i Evropës të përfshihet në monitorimin e Gjykatës Speciale për të siguruar që ajo të veprojë brenda mandatit të saj.
“Nëse Këshilli i Evropës si autoritet mbi të cilin raportet dhe rezultatet e të cilit është themeluar kjo gjykatë, ndoshta duhet të aktivizohet për ta monitoruar vetë dhe ta shohë se a është në linjën e kërkesave që i ka pasur kjo organizatë”, tha Avokati i Popullit.
