Së paku në dy ditët e ardhshme nuk do të ketë veprime në funksion të caktimit të ri të mandatarit, që duhet ta bëjë presidentja Vjosa Osmani.
Ajo ka mbërritur në Arabinë Saudite për të marrë pjesë në forumin “Iniciativa për Investime në të Ardhmen”, i cili është hapur të hënën e do të përmbyllet të mërkurën.
Osmani ka dhjetë ditë në dispozicion për zhvillimin e diskutimeve me përfaqësues të partive politike në lidhje me caktimin e mandatarit, pasi kryetari i Vetëvendosjes, Albin Kurti, ka dështuar të sigurojë mjaftueshëm vota të dielën në Kuvend, për ta formuar qeverinë e re.
E gjatë ditës, kryetari i LDK-së, Lumir Abdixhiku, ka takuar atë të Nismës Socialdemokrate, Fatmir Limaj. Por, pas takimit nuk kanë treguar nëse diskutimi është bërë për ndonjë koalicionin eventual.
Ndërkaq deputetja e Vetëvendosjes, Mimoza Kusari-Lila, e ka lënë të hapur mundësinë që Kurti të synojë edhe një herë ta bëjë qeverinë.
Zgjedhjet eventuale të parakohshme do të shënonin procesin e tretë elektoral brenda vitit, pa përfshirë balotazhin që do të mbahet pas dy javësh.
Në KQZ kanë thënë se organizimi i zgjedhjeve të reja do të përbëjë sfidë për këtë institucion.
Të dielën, mandatari për formimin e Qeverisë, Albin Kurti nuk arriti të marrë 61 votat e nevojshme për formimin e qeverisë.
Pas seancës, të gjithë taborët politikë kanë deklaruar se nuk janë të gatshëm që të propozojnë një mandatar të ri dhe kanë shprehur gatishmërinë për të shkuar në zgjedhjeve të parakohshme.
