Lideri Suprem i Iranit, Ajatollah Ali Khamenei, deklaroi të hënën se bashkëpunimi midis Iranit dhe Shteteve të Bashkuara nuk është i mundur për sa kohë që Uashingtoni mbështet Izraelin, mban baza ushtarake në rajon dhe ndërhyn në Lindjen e Mesme.
Khamenei tha: “Amerikanët ndonjëherë thonë se do të donin të bashkëpunonin me Iranin. Bashkëpunimi me Iranin nuk është i mundur për sa kohë që SHBA-ja vazhdon të mbështesë regjimin e mallkuar sionist, mbajnë baza ushtarake dhe ndërhyjnë në rajon.”
Komentet e tij vijnë ndërsa administrata e presidentit Donald Trump ka shprehur gatishmërinë për të rritur presionin mbi Iranin, por gjithashtu ka deklaruar se dora e miqësisë dhe bashkëpunimit mbetet e hapur, duke pritur që Teherani të jetë i gatshëm për një marrëveshje, raporton Reuters.
Të dy vendet kanë zhvilluar disa runde bisedimesh bërthamore, të cilat janë hasur me pengesa, kryesisht lidhur me pasurimin e uraniumit në Iran, të cilin fuqitë perëndimore kërkojnë ta minimizojnë për të shmangur çdo rrezik të armatimit.
