Nënkryetarja e Kuvendit dhe ish-ministrja e Drejtësisë nga Lëvizja Vetëvendosje, Albulena Haxhiu, ka deklaruar se LVV e konsideron qeverisjen e saj si më të mirën deri më tani dhe se përgjegjësia për ngërçin politik pas zgjedhjeve të 9 shkurtit bie mbi partitë ish-opozitare.
Ajo shprehu bindjen se në zgjedhjet e parakohshme të 28 dhjetorit LVV do të shënojë rezultat dukshëm më të mirë, ndërsa përjashtoi koalicionin me PDK-në pa një reformim të thellë të saj.
Haxhiu akuzoi opozitën për bllokim të konstituimit të Kuvendit dhe formimit të Qeverisë, kritikoi Prokurorinë Speciale për, sipas saj, mospërballje me korrupsionin dhe veprime hakmarrëse ndaj qeverisë, si dhe kundërshtoi certifikimin e Listës Serbe duke e cilësuar atë të dirigjuar nga Serbia dhe kundër rendit kushtetues të Kosovës.
Ajo mbrojti Kryeministrin Albin Kurti dhe ministren Rozeta Hajdari nga akuzat, ndërsa theksoi se sfidë e vazhdueshme mbetet mosdorëzimi nga Serbia i personave përgjegjës për sulmet terroriste në Kosovë.
