Presidenti i Ukrainës, Volodymyr Zelensky, ka deklaruar se Shtetet e Bashkuara i kanë ofruar Ukrainës garanci sigurie për 15 vjet, gjatë bisedimeve mbi një plan të rishikuar paqeje me presidentin amerikan Donald Trump, të mbajtura në Florida.
Sipas Zelenskyt, një marrëveshje e përgjithshme paqeje është rreth 90 për qind e përfunduar, ndërsa Trump ka vlerësuar se disa pika janë “afër 95%” të dakorduara.
Megjithatë, Zelensky ka theksuar se Ukraina do të preferonte garanci sigurie afatgjata, deri në 30, 40 apo 50 vjet.
Çështjet kryesore ende të pazgjidhura mbeten territori i Donbasit dhe e ardhmja e centralit bërthamor të Zaporizhzhias, i kontrolluar nga Rusia.
Rusia, ndonëse ka refuzuar pjesë kyçe të planit, ka sinjalizuar se paqja është më afër, ndërsa SHBA-të presin që edhe aleatët evropianë të marrin rol të rëndësishëm në garantimin e sigurisë së Ukrainës.
