Njësitë e Komunikacionit Rrugor në Ferizaj raportojnë se më 5 janar 2026, një 17-vjeçar me iniciale E.A., duke drejtuar një VW Golf me targa vendore, nuk iu ndal patrullës së policisë në shenjën “STOP”.
Duke vazhduar lëvizjen, ai shkaktoi një aksident me dëme materiale në rrugën magjistrale të fshatit Bibaj, duke u përplasur me një automjet tjetër.
Gjatë kontrollit, u konstatua se i dyshuari nuk kishte patentë shoferi dhe automjeti ishte i paregjistruar që nga 13 tetori 2024.
Policia mori këto masa: gjoba 150 € për mosndalje, 250 € për shkaktim të aksidentit, 200 € për automjet të paregjistruar, ndërsa u iniciua rast gjyqësor për drejtim pa patentë dhe automjeti u konfiskua përkohësisht. Apelohet që qytetarët të respektojnë rregullat e trafikut për rritjen e sigurisë në rrugë.
