Gjykata e Prishtinës i ka vazhduar Fatmir Shehollit masën e paraburgimit për dy muaj të tjerë, pasi ai dyshohet për spiunazh në vazhdimësi**. Paraburgimi i Shehollit, i cili ishte arrestuar më 9 tetor 2025, është i vlefshëm deri më 9 mars 2026.
Sipas Prokurorisë Speciale, Sheholli dyshohet se është rekrutuar nga BIA serbe dhe ka ofruar ndihmë të vazhdueshme për këtë shërbim të huaj, duke mbledhur të dhëna për prona, aktivitete biznesore dhe funksionimin e institucioneve të Kosovës, dhe duke i shpërndarë ato më pas në mediat online dhe për zyrtarët e BIA-s. Hetimet ndaj tij kanë nisur që nga gushti 2024 dhe kanë përfshirë përgjim fizik dhe vëzhgime direkte.
Dosja e Prokurorisë lidh Shehollin edhe me fondin special të AKI-së, ku thuhet se rreth 500 mijë euro që ishin dorëzuar nga ish-drejtori Driton Gashi i ishin dhënë Shehollit, ndërsa 139 mijë euro të tjera vijnë nga Shpend Maxhuni. Sheholli është një figurë e njohur publike në Kosovë dhe ishte përmendur edhe nga kryeministri në detyrë, Albin Kurti, i cili e cilësoi atë “bashkëpunëtor të Serbisë”.
Gjykata ka pranuar kërkesën e Prokurorisë Speciale për vazhdimin e paraburgimit, duke siguruar kohë për hetime të mëtejshme në këtë çështje të ndjeshme të sigurisë shtetërore.
