Punëtorët e Spitalit të Përgjithshëm “Dr. Sami Haxhibeqiri” në Mitrovicë kanë mbajtur një protestë të organizuar nga Sindikata, për të shprehur pakënaqësinë dhe indinjatën pas sulmit të një dite më parë ndaj një infermiereje dhe dy punonjësve të sigurimit në Repartin e Ortopedisë. Sulmi ndaj stafit ndodhi teksa punonjësit po siguronin respektimin e rregullave të hyrjes në repart dhe ka sjellë trajtim emergjent mjekësor për të tre. Punëtorët dënuan ashpër dhunën, duke kërkuar që autorët të mbahen përgjegjës dhe institucione të sigurojnë masa konkrete për mbrojtjen e stafit shëndetësor në të ardhmen. Oda e Infermierëve thekson se sulmet ndaj stafit janë të papranueshme dhe kërkon hetim dhe masa urgjente për sigurinë e punonjësve.
