Kryeministri i Shqipërisë, Edi Rama, ka njoftuar se ka marrë ftesë nga presidenti i Shteteve të Bashkuara të Amerikës, Donald Trump, për të përfaqësuar Shqipërinë në një Bord Ndërkombëtar të Paqes, i cili ka për qëllim të ndihmojë përpjekjet për arritjen e paqes në Gazë.
Sipas kryeministrit, kjo është një nismë e re ndërkombëtare e iniciuar nga presidenti amerikan, ndërsa Shqipëria është ftuar të jetë pjesë e saj si anëtare themeluese. Rama ka vlerësuar se kjo ftesë përbën një vlerësim të rëndësishëm për rolin e Shqipërisë në arenën ndërkombëtare.
Ai ka theksuar se përfshirja në këtë bord pasqyron forcimin e marrëdhënieve strategjike mes Shqipërisë dhe Shteteve të Bashkuara të Amerikës, si dhe rritjen e besimit ndërkombëtar ndaj kontributit të Shqipërisë në çështje globale.
Kryeministri ka shtuar se Shqipëria po afirmohet gjithnjë e më shumë si një vend i respektuar dhe aktiv në nisma ndërkombëtare që synojnë paqen dhe stabilitetin.
