Ministri në detyrë i Mbrojtjes, Ejup Maqedonci, ka shprehur ngushëllime pas ndarjes nga jeta të Nënës Zymë Mazrekaj, nënës së dëshmorëve Tahir dhe Agim Mazrekaj. Ai e ka përshkruar atë si “pasqyrën më të denjë të sakrificës” dhe ka vlerësuar rolin e nënave shqiptare në historinë e qëndresës dhe lirisë së vendit.
Maqedonci ka theksuar se borxhi ndaj nënave të dëshmorëve është i pashlyeshëm dhe se kujtimi dhe nderimi për to do të jetë i përjetshëm. Nëna Zymë Mazrekaj është përcjellë për në banesën e fundit me flamur dhe nderime ushtarake, ndërsa ministri ka përfunduar duke uruar: “U prehtë në paqe shpirti i saj fisnik. Lavdi në përjetësi!”
