Në Ditën Ndërkombëtare të Kujtimit të Holokaustit, Ambasada e Gjermanisë në Kosovë nderoi viktimat e kampit të përqendrimit Auschwitz, duke rikujtuar më shumë se një milion persona të vrarë, përfshirë hebrenj, Sinti dhe Roma, të burgosur politikë, personat me aftësi të kufizuara dhe homoseksualë.
Ambasada, së bashku me ambasadorin gjerman Rainer Rudolph dhe ambasadoren e Izraelit Tamar Ziv, theksoi rëndësinë e kujtesës historike dhe edukimit për të parandaluar përsëritjen e këtyre krimeve. Valixhet e ekspozuara në Muzeun Auschwitz-Birkenau shërbejnë si dëshmi e heshtur e vuajtjes dhe persekutimit nazist, duke përkujtuar edhe ata që mbijetuan Holokaustin.
Më shumë se 80 vjet pas Luftës së Dytë Botërore, dëshmitarët e drejtpërdrejtë janë gjithnjë e më pak, duke rritur nevojën për ruajtjen e kujtesës kolektive.
