Akademia e Shkencave dhe e Arteve e Kosovës (ASHAK) ka shprehur shqetësim lidhur me propozimin e Zyrës së Prokurorit Special për dënimin e katër figurave udhëheqëse të UÇK-së, përfshirë Hashim Thaçin dhe Kadri Veselin.
ASHAK thekson se procesi duhet të zhvillohet në përputhje me standardet ndërkombëtare dhe të respektojë të drejtën e njeriut, sipas Kushtetutës së Kosovës dhe Konventës Evropiane për të Drejtat e Njeriut.
Akademia paralajmëron se çdo shmangie mund të ndikojë politikisht dhe të cënojë legjitimitetin e drejtësisë.
Institucioni thekson se lufta e UÇK-së dhe sakrificat e shqiptarëve janë pjesë e historisë së dokumentuar dhe nuk duhet të keqinterpretohen ose stigmatizohen. ASHAK propozon krijimin e mekanizmave të pavarur për monitorimin e respektimit të të drejtave të njeriut nga Gjykata Speciale, duke garantuar transparencë dhe llogaridhënie.
Në përfundim, Akademia ofron ekspertizën e saj për të siguruar që çdo proces gjyqësor të zhvillohet me drejtësi, paanshmëri dhe respekt për kujtesën historike të Kosovës.
