Njohësi i çështjeve politike, Azem Vllasi, ka deklaruar se vazhdimi i dialogut ndërmjet Kosovë dhe Serbi do të ndodhë vetëm kur i dërguari special i Bashkimit Evropian të ftojë palët në tryezën e bisedimeve, duke theksuar se pala kosovare duhet të jetë e përgatitur për këtë proces.
Vllasi theksoi se Kosova duhet të përqendrohet në dy çështje kryesore: zbatimin e marrëveshjeve të arritura në Bruksel në shkurt 2023 dhe në Ohër në mars 2023, si dhe insistimin në njohjen reciproke mes dy shteteve si vende të pavarura.
Ai vlerësoi se pala serbe mund të kërkojë formimin e Bashkësisë së komunave me shumicë serbe, por sipas tij, kjo është një çështje e brendshme e Kosovës, e cila duhet të zgjidhet në bashkëpunim me serbët lokalë dhe pushtetin vendor.
Vllasi komentoi edhe masat e Bashkimi Evropian, duke theksuar se ato, sipas autoriteteve evropiane, do të hiqen pas konstituimit të Parlamentit dhe zgjedhjes së Qeverisë dhe nuk duhet të lidhen me dialogun Kosovë–Serbi, pasi kjo do të interpretohej si presion ndaj Kosovës.
Ai shtoi se BE-ja është e informuar për qëndrimin e Serbisë lidhur me moszbatimin e marrëveshjeve të vitit 2023 dhe, në rast se duhet të merren masa ndëshkuese, ato duhet të drejtohen ndaj palës serbe.
