Prokurorët italianë po zhvillojnë hetime lidhur me zhdukjen e rreth 2,500 pjesëve të aeroplanëve ushtarakë nga depot e Forcave Ajrore në Brindizi, me një vlerë të përgjithshme rreth 17 milionë euro.
Pjesët e humbura përfshijnë module dhe sisteme elektronike për aeroplanët luftarakë-bombardues Panavia Tornado dhe AMX si dhe aeroplanët transportues Lockheed C-130 Hercules, të cilat janë të nevojshme për funksionimin e sigurt të fluturimeve ushtarake.
Hetuesit kanë përfshirë në regjistrin e dyshuarish disa zyrtarë të lartë të logjistikës së Forcave Ajrore, gjeneralë dhe drejtues të kompanisë private që menaxhon mirëmbajtjen e depotëve.
Ky incident ka ngritur shqetësime për mënyrën se si pjesët kritike mund të zhduken nga inventari zyrtar para se të hiqen fizikisht nga depot, duke përfshirë certifikimin e gabuar “jashtë përdorimit” për disa nga pjesët e humbura. Hetuesit shqyrtojnë mundësinë e një devijimi të organizuar të këtyre komponentëve, me disa raportime që sugjerojnë se ato mund të jenë dërguar në Amerikën e Jugut, veçanërisht në Brazil.
