Organizata e Veteranëve të Luftës së Ushtrisë Çlirimtare të Kosovës ka reaguar pas deklaratave të ministrit për Komunitete dhe Kthim, Nenad Rashiq, lidhur me mënyrën se si është marrë vendimi për transferimin e 24 hektarëve tokë në emër të Manastirit të Deçanit.
Në reagim thuhet se deklaratat sipas të cilave kryeministri Albin Kurti e ka marrë këtë vendim “për hatër” të ministrit tregojnë, sipas tyre, qasjen e pushtetit ndaj interesave të qytetarëve të Kosovës.
Veteranët e luftës e kanë cilësuar situatën si të papranueshme, duke theksuar se kategoritë e dala nga lufta kundërshtojnë çdo veprim që, sipas tyre, lidhet me lojëra rreth pronës dhe territorit të Kosovës.
OVL e UÇK-së thekson se çdo përpjekje për ta relativizuar këtë çështje përbën, sipas tyre, shkelje të dinjitetit dhe të sakrificës së atyre që ranë për lirinë e vendit.
Debati për pronën e Manastirit të Deçanit është rikthyer në qendër të diskutimit publik pas deklaratave të fundit të ministrit Rashiq për procesin e regjistrimit të 24 hektarëve tokë në emër të manastirit.
