Një studim i ri sugjeron se Sëmundja e Alzheimerit mund të fillojë shumë më herët dhe në pjesë të tjera të trupit, e jo drejtpërdrejt në tru siç është besuar për dekada.
Sipas një analize të thelluar gjenomike, procesi i sëmundjes mund të lidhet fillimisht me inflamacion në organe të tjera si lëkura, mushkëritë apo zorrët. Studiuesit thonë se simptomat e para mund të shfaqen edhe dhjetëra vite para se të nisë përkeqësimi i kujtesës.
Studimi është udhëhequr nga studiuesi Cesar Cunha nga Qendra e Fondacionit Novo Nordisk për Kërkime Bazë Metabolike në Danimarkë. Ai dhe ekipi i tij analizuan të dhënat gjenetike të më shumë se 85 mijë personave me Alzheimer dhe rreth 485 mijë personave të shëndetshëm, të mbledhura nga Biobanka Evropiane e Alzheimerit dhe Demencës.
Përveç kësaj, studiuesit analizuan aktivitetin gjenetik në rreth pesë milionë qeliza individuale, të marra nga 40 zona të ndryshme të trupit dhe 100 rajone të trurit. Ata shqyrtuan gjithashtu rreth 1000 gjene që lidhen me një rrezik më të lartë për shfaqjen e Alzheimerit.
Rezultatet treguan se këto gjene ishin shumë më pak aktive në tru sesa në organe të tjera si lëkura, mushkëritë, sistemi tretës dhe shpretka, si edhe në disa lloje qelizash imunitare që qarkullojnë në gjak.
Sipas studiuesve, kjo mund të nënkuptojë se Alzheimeri mund të nisë nga inflamacioni në organet periferike dhe më pas të përhapet gradualisht drejt sistemit nervor.
Ata theksojnë se, nëse kjo teori konfirmohet nga kërkime të tjera, ajo mund të ndryshojë mënyrën se si diagnostikohet dhe trajtohet sëmundja, duke u fokusuar më shumë te proceset inflamatore në të gjithë trupin dhe jo vetëm në tru
