Ministri i Punëve të Jashtme dhe Diasporës, Glauk Konjufca, ka reaguar pas një ngjarjeje tragjike të ndodhur në Vjenë të Austrisë, ku tre qytetarë të Kosovës kanë humbur jetën si pasojë e një aksidenti në vendin e punës.
Përmes një reagimi publik, ai ka bërë të ditur se institucionet përkatëse të Kosovës, në bashkëpunim me Ambasadën e Republikës së Kosovës në Vjenë, janë në kontakt të vazhdueshëm me familjet e viktimave dhe autoritetet austriake, me qëllim të ofrimit të mbështetjes dhe lehtësimit të procedurave të nevojshme.
Konjufca ka theksuar se viktimat – Asllan Musliu, Istref Zekaj dhe Pajtim Bajrami – ishin pjesë e rëndësishme e diasporës kosovare, e cila ndër vite ka luajtur rol kyç në ruajtjen e lidhjeve me atdheun dhe në zhvillimin ekonomik e shoqëror të vendit.
Ai ka nënvizuar se humbja e tyre është jo vetëm dhimbje për familjet, por edhe për gjithë shoqërinë kosovare, duke vlerësuar kontributin dhe sakrificën e bashkatdhetarëve jashtë vendit.
Në fund, ai ka shprehur ngushëllimet më të sinqerta për familjet e viktimave dhe të gjithë ata që janë prekur nga kjo tragjedi.
