Ministri i Mbrojtjes së Shqipërisë, Ermal Nufi, komentoi stërvitjen ushtarake të Serbisë pranë kufirit me Kosovën, duke theksuar se siguria e qytetarëve shqiptarë dhe e Kosovës është e garantuar nga KFOR dhe NATO.
Ai shtoi se Shqipëria ka politikat e sigurisë në përputhje të plotë me aleancën ushtarake dhe se përgatitja e Forcave të Armatosura është e koordinuar për të siguruar mbrojtjen e qytetarëve.
Nufi njoftoi gjithashtu miratimin e një vendimi për kompensimin e transportit të ushtarakëve aktivë, që përmirëson kushtet financiare dhe përafron pagat me standardet e strukturave të tjera ligjzbatuese. Ai theksoi se vendimi do të ofrojë kushte më dinjitoze për ushtarakët, veçanërisht për ata që shërbejnë jashtë vendit, dhe rikujtoi se rritja e pagave në Forcat e Armatosura ka arritur 10.6% deri në fund të vitit 2025.
Ministri shtoi se objektivi i qeverisë është që deri në vitin 2029, pagat dhe përgatitja e ushtrisë shqiptare të jenë të krahasueshme me mesataren e vendeve anëtare të NATO-s.
