Kombëtarja e Kosovës në hendboll e ka fituar edhe ndeshjen e dytë me Britaninë e Madhe.
Të dielën mbrëma në Pallatin e Rinisë dhe Sportit në kryeqytet, në praninë e një numri të konsiderueshëm shikuesish, Kombëtarja jonë fitoi me rezultat 35:30. Në Derby të Anglisë, të mërkurën, djemtë tanë fituan 32:26.
Me rezultatin e përgjithshëm 67:56, Kombëtarja jonë avancon në raundin e dytë të kualifikimeve për Kupën e Botës 2027. Është hera e parë që Kombëtarja jonë avancon nga raundi i parë kualifikues për Botëror.
Në tri pjesëmarrjet e para kishte fazë grupore, ndërsa për Botërorin 2025 jemi përballur me Sllovakinë.
Ndeshjet e fazës së dytë kualifikuese luhen në muajin mars të vitit të ardhshëm. Gjithsej janë tri faza.
