Këshilli Prokurorial i Kosovës (KPK), nën udhëheqjen e kryesuesit Ardian Hajdaraj, ka mbajtur takimin e tij të 280-të, ku janë shqyrtuar dhe miratuar disa vendime me rëndësi për funksionimin e sistemit prokurorial në vend.
Gjatë mbledhjes, KPK ka autorizuar kryesuesin Hajdaraj që të nënshkruajë në emër të institucionit Marrëveshjen e Bashkëpunimit me Këshillin e Lartë të Prokurorisë së Shqipërisë, një iniciativë që synon forcimin e bashkëpunimit ndërinstitucional dhe shkëmbimin profesional mes dy sistemeve prokuroriale.
Po ashtu, Këshilli ka vendosur t’i procedojë Presidentes së Kosovës kërkesën për lirimin nga detyra të prokurorit Slobodan Bakiq nga Prokuroria Themelore në Mitrovicë, pasi ai ka arritur moshën e pensionimit.
Në mbledhje është marrë edhe vendimi për referimin e ankesës disiplinore AD.nr.10/2025 tek Komisioni për Vlerësimin e Performancës së Prokurorëve, për shqyrtim të mëtejmë sipas procedurave përkatëse.
Një tjetër vendim i rëndësishëm ishte anulimi i procesit të rekrutimit të prokurorëve, çka pritet të ndikojë në ritmin e plotësimit të pozitave të lira brenda sistemit prokurorial.
KPK theksoi se këto vendime janë të domosdoshme për rritjen e efikasitetit, transparencës dhe llogaridhënies në sistemin prokurorial të Kosovës.
