Gjykata Supreme e Kosovës ka miratuar kërkesën e Institutit Demokratik të Kosovës (KDI) dhe ka vendosur shfuqizimin e një pjese të Rregullores së Qeverisë së Kosovës që rregullon kompensimin e udhëtimeve zyrtare. Lajmi është bërë i ditur nga KDI, ndërsa palë e paditur në këtë rast ka qenë Qeveria e Kosovës.
Rasti kishte të bënte me një grup ushtarësh të Forcës së Sigurisë së Kosovës, të cilët i ishin drejtuar KDI-së për ndihmë ligjore, pasi nuk po kompensoheshin për udhëtimet jashtë vendit gjatë misioneve që zgjasnin më shumë se një muaj. Pas shqyrtimit të çështjes, KDI kishte konstatuar se rregullorja në fuqi i vendoste ushtarët në një pozitë të padrejtë dhe ishte në kundërshtim me ligjin.
Gjykata Supreme e vërtetoi këtë vlerësim, duke konstatuar se rregullorja kishte tejkaluar kompetencat ligjore dhe duhej ndryshuar.
Sipas KDI-së, ky vendim përfaqëson një hap të rëndësishëm drejt drejtësisë dhe trajtimit të barabartë të ushtarëve të FSK-së, si dhe një shembull të rëndësisë së raportimit qytetar dhe llogaridhënies institucionale.
