Ndërtimi dhe operimi i pakontrolluar i hidrocentraleve po vazhdon të paraqesë kërcënim për rrjedhën natyrore të lumenjve dhe biodiversitetin, thonë banorët e zonës së Shtërpcës. Ata ankohen për ndalje të shpeshta të ujit, duke theksuar se në disa raste rrjedha bie në minimum dhe dëmton jetën ujore.
Ministrja e Mjedisit, Fitore Pacolli, së bashku me inspektorë dhe zyrtarë të tjerë, ka zhvilluar inspektime në disa zona për të verifikuar nëse hidrocentralet po operojnë në përputhje me ligjin dhe kushtet mjedisore. Inspektimet kanë përfshirë kontrollin e rrjedhës së ujit, turbinave dhe dokumentacionit përkatës.
Pacolli deklaroi se mbrojtja e lumenjve dhe ujërave është prioritet i ministrisë, duke theksuar angazhimin për vendosjen e ligjshmërisë dhe shfrytëzimin e qëndrueshëm të burimeve ujore. Gjatë kontrolleve janë evidentuar mungesa në dokumentacion dhe mangësi të tjera, ndërsa në ditët në vijim pritet hartimi i një raporti me gjetjet dhe hapat e mëtejmë institucionalë.
