Operatori Ekonomik Rrjeti Ballkanik i Gazetarisë Hulumtuese (BIRN) ka tërhequr mbi 150 mijë euro nga xhirollogaria e RTK-së nëpërmjet një procesi përmbarimor, për të paguar borxhe të papaguara për bashkëprodhimin e emisioneve “Jeta në Kosovë” dhe “Drejtësia në Kosovë”. Kjo shumë, e cila është e lidhur me mbi 100 emisione hulumtuese, ka datuar që nga viti 2019 dhe ka kaluar përmes të gjitha shkallëve ligjore, duke arritur në një vendim përfundimtar të Gjykatës së Apelit.
BIRN Kosova ka sqaruar se pagesat për këto emisione ishin parashikuar në buxhetin e RTK-së dhe janë pjesë e obligimeve ligjore të televizioneve publike që duhet të ndajnë 20% të buxhetit për prodhime të pavarura. Megjithatë, menaxhmentet e kaluara të RTK-së, sipas BIRN, kanë refuzuar mundësinë për të paguar në këste dhe kanë grumbulluar borxhe, duke i detyruar ata të kërkojnë mjetet përmes rrugëve ligjore dhe përmbaruesit.
BIRN Kosova ka theksuar se ka pasur vullnet për të gjetur një marrëveshje për pagesën e borxhit në këste, por se menaxhmentet e RTK-së e kanë refuzuar këtë mundësi, çka ka çuar në përmbarim. Ata gjithashtu kanë hedhur poshtë pretendimet për parregullsi, duke i cilësuar si pjesë të një fushate shpifëse dhe kanë shprehur mbështetje për një RTK të pavarur dhe profesionale.
