Shefi i grupit parlamentar të Aleanca për Ardhmërinë e Kosovës, Besnik Tahiri, ka kritikuar para seancës plenare të Kuvendi i Kosovës vendimin për shpërndarjen e pagës së 13-të vetëm për sektorin publik, duke e cilësuar këtë “të marrë”, pasi nuk përfshin punëtorët në sektorin privat, raporton Ekonomia Online.
Tahiri tha se paga e 13-të nuk ka ndihmuar në zbutjen e varfërisë dhe nuk ka sjellë përfitime reale, duke e përshkruar si një masë me natyrë preelektorale:
“Rroga e 13-të për sektorin publik nuk ka qëllim të zbusë varfërinë, as të ulë pabarazinë. Është vetëm një veprim për t’i përmbushur zotimet paraelektorale dhe për të ndikuar në votë,” tha ai.
Ai theksoi se mendja e qytetarëve është tek punëtorët në ndërtimtari, mjeshtrit, shitësit në dyqane dhe gazetarët që punojnë mbi orarin tetëorësh, të cilët nuk kanë përfituar nga kjo masë.
Tahiri kërkoi veprime urgjente nga qeveria për sektorin privat:
“Qeveria duhet të dalë me një plan për gratë dhe burrat e sektorit privat, që sot janë të mërzitur nga shpërndarja e pagës vetëm për sektorin publik. Nëse mund të bëhet për sektorin publik për arsye elektorale, duhet të bëhet edhe për tjetrin.”Ai theksoi nevojën për një qasje më të drejtë dhe gjithëpërfshirëse për të gjithë punëtorët e Kosovës.
