Dy impiante energjetike në Bahrein janë përfshirë nga zjarret pas sulmeve të raportuara iraniane, në mes të përshkallëzimit të tensioneve në rajon.
Sipas agjencisë shtetërore BNA, disa njësi operative të Gulf Petrochemical Industries Company janë goditur nga dronë, duke shkaktuar zjarre në pjesë të ndryshme të impiantit. Flakët janë shuar më vonë dhe nuk janë raportuar viktima.
Në një incident tjetër, Bapco Energies njoftoi se një depozitë në një nga objektet e saj të magazinimit u përfshi nga zjarri pas një sulmi me dron, por edhe në këtë rast nuk pati të lënduar.
Autoritetet konfirmuan se situata tashmë është nën kontroll, ndërsa këto sulme vijnë si pjesë e goditjeve hakmarrëse të Iranit ndaj aleatëve të SHBA-së në rajon.
Bahrein, që strehon Flotën e Pestë të Marinës amerikane, mbetet një pikë kyçe strategjike për operacionet ushtarake të SHBA-së në Lindjen e Mesme.
