Kombëtarja e Kosovës në volejboll për femra ka regjistruar një fitore të rëndësishme në kuadër të CEV Volleyball European League, duke e mposhtur Malin e Zi me rezultat bindës 3:0.
Vajzat dardane dominuan plotësisht ndeshjen nga fillimi deri në fund, duke mos i lënë hapësirë kundërshtares dhe duke fituar setet me rezultat 25:19, 25:21 dhe 25:15.
Ekipi i Kosovës tregoi paraqitje të qëndrueshme, me lojë të organizuar mirë, disiplinë taktike dhe shpirt të lartë luftarak, duke e kontrolluar ritmin e lojës në të gjitha setet.
Fitorja vlerësohet edhe më shumë duke marrë parasysh se Mali i Zi kishte qenë ndër ekipet më të forta në këtë garë dhe kishte rezultate të mira në ndeshjet e mëparshme.
Në Pallatin e Rinisë, para tifozëve vendas, Kosova tregoi rritje të dukshme në skenën evropiane dhe sinjale pozitive për ndeshjet e ardhshme në këtë kompeticion.
