Ish-ministri i Jashtëm i Shqipërisë, Paskal Milo, ka kritikuar zhvillimet politike në Kosovë, duke thënë se vendi po hyn në një cikël krizash institucionale pas dështimit për zgjedhjen e presidentit.
Në një intervistë për “News24”, ai ka vlerësuar se partitë politike kanë vepruar në mënyrë të papërgjegjshme dhe nuk kanë arritur të sigurojnë kompromisin e nevojshëm për funksionimin normal të institucioneve.
Milo ka theksuar se edhe pas zgjedhjeve të reja nuk ka garanci për stabilitet politik, duke shtuar se Kosova mund të përballet me komplikime të mëtejshme institucionale.
Ai ka komentuar gjithashtu edhe rolin e faktorit ndërkombëtar, duke thënë se, sipas tij, vërehet lodhje në angazhimin e tyre ndaj situatës politike në Kosovë.
Në deklaratën e tij, Milo ka folur edhe për marrëdhëniet mes Shqipërisë dhe Kosovës, duke i cilësuar ato si të tensionuara dhe të vështira për t’u përmirësuar në mënyrë thelbësore në afat të shkurtër.
