Kosova po përballet me dy opsione për sigurimin e stabilitetit afatgjatë në sektorin e energjisë: gazifikimin e thëngjillit ose përfshirjen në nismat rajonale për gazin natyror të lëngshëm (LNG).
Shtetet e Bashkuara të Amerikës kanë shprehur mbështetje për diversifikimin e furnizimit me energji përmes LNG-së, duke theksuar gatishmërinë për bashkëpunim me Kosovën në këtë drejtim. Ambasada amerikane në Prishtinë ka bërë të ditur se eksportet e energjisë nga SHBA-ja janë pjesë e rëndësishme e bashkëpunimit me partnerët evropianë.
Ndërkohë, ekspertë të energjisë vlerësojnë se përfshirja në rrjetin rajonal të LNG-së përmes interkonjeksionit me Maqedoninë e Veriut paraqet opsion më realist dhe më të zbatueshëm, si nga ana teknike ashtu edhe financiare. Projekti do ta lidhte Kosovën me terminalin e LNG-së në Greqi, me një kosto të vlerësuar rreth 100 milionë euro.
Sipas tyre, Kosova ka shpenzuar rreth 1 miliard euro për import të energjisë në pesë vitet e fundit, duke e bërë investimin në infrastrukturë të re energjetike të rëndësishëm për uljen e varësisë.
Megjithatë, kritikët e shohin me skepticizëm si gazifikimin e thëngjillit ashtu edhe LNG-në, duke i cilësuar si opsione të shtrenjta dhe me ndikim negativ në mjedis, në krahasim me investimet në energji të ripërtëritshme.
Ekspertët theksojnë se Kosova duhet të fokusohet në energji të gjelbër, ruajtje të energjisë dhe efiçiencë energjetike, ndërsa çdo vendim strategjik duhet të balancojë aspektet ekonomike, mjedisore dhe gjeopolitike.
