Ushtruesja e detyrës së Presidentes, Albulena Haxhiu, mori pjesë në hapjen e Seminarit të 44-të Ndërkombëtar për Gjuhën, Letërsinë dhe Kulturën Shqiptare.
Haxhiu theksoi rëndësinë e ruajtjes dhe zhvillimit të gjuhës shqipe, duke thënë se ajo nuk duhet të mbetet vetëm pjesë e së kaluarës, por të jetë e pranishme edhe në zhvillimet teknologjike.
Ajo vuri në dukje se digjitalizimi dhe zhvillimi i inteligjencës artificiale krijojnë sfida të reja për gjuhët me më pak materiale digjitale.
Sipas saj, institucionet duhet të mbështesin kërkimin shkencor, digjitalizimin, botimin dhe zhvillimin e mjeteve teknologjike për shqipen.
Haxhiu tha se puna e studiuesve dhe albanologëve është thelbësore që shqipja të ruajë dhe zgjerojë praninë e saj në botën moderne.
