Kryetarja e Kuvendit të Kosovës Albulena Haxhiu ka përkujtuar 25-vjetorin e masakrave të 25 marsit 1999, duke theksuar se krimet ndaj civilëve shqiptarë ishin të organizuara dhe pjesë e një plani për spastrimin etnik në Kosovë.
Ajo rikujtoi se në fshatrat Celinë, Fortesë, Goden, Randobravë dhe Tërrnje u vranë rreth 200 civilë të pafajshëm, përfshirë gra, fëmijë dhe të moshuar, ndërsa familje të tëra u shuan dhe vendbanimet u shkatërruan.
Haxhiu tha se gjatë homazheve në Tërrnje u vendosën lule pranë memorialit të martirëve dhe u vizitua i mbijetuari Bekim Gashi, i cili humbi nënën dhe katër motrat, trupat e të cilave ende nuk janë gjetur. Ai, sipas saj, ka ndjekur për vite procese gjyqësore dhe zhvarrime pa rezultat.
Ajo theksoi se institucionet dhe qytetarët ndajnë dhimbjen me familjet e viktimave dhe të zhdukurve, duke u zotuar se kërkimi i drejtësisë nuk do të ndalet kurrë.
“Lavdi të gjithë martirëve dhe dëshmorëve të kombit”, përfundoi ajo.
