Organizata Botërore Meteorologjike e OKB-së ka paralajmëruar se një seri vitesh me temperatura rekord është “pothuajse e sigurt” deri në vitin 2030, ndërsa kriza klimatike po përkeqësohet.
Sipas një raporti të ri të përgatitur nga Zyra Meteorologjike e Mbretërisë së Bashkuar, ekziston 86% mundësi që të paktën një vit mes 2026 dhe 2030 të thyejë rekordin e vitit 2024 si viti më i nxehtë i regjistruar ndonjëherë.
Raporti po ashtu tregon se ka 75% gjasë që temperatura mesatare globale të kalojë 1.5°C mbi nivelet para-industriale gjatë periudhës 2026–2030.
Shkencëtarët paralajmërojnë se rritja e emetimeve të dioksidit të karbonit nga lëndët djegëse fosile po vazhdon të ngrohë atmosferën, duke shtuar valët e të nxehtit, thatësirat dhe përmbytjet në shumë pjesë të botës.
Raporti përmend edhe ndikimin e mundshëm të fenomenit El Niño, i cili mund të rrisë edhe më tej temperaturat globale, me mundësi të lartë zhvillimi në periudhën 2026–2027.
Zyrtarë të OKB-së dhe ekspertë të klimës kanë bërë thirrje për ulje urgjente të emetimeve dhe kalim drejt energjisë së pastër për të kufizuar pasojat e ndryshimeve klimatike.
