Për ruajtjen e ushqimeve të mbetura, për marrjen e drekës në punë apo për ushqime të lehta për fëmijët në shkollë, përdoren lloje të ndryshme kontejnerësh me forma, madhësi dhe materiale të ndryshme.
Më të përdorurat janë qelqi, plastika dhe çeliku, të cilët kanë karakteristika të ndryshme dhe përshtaten sipas nevojave të përdorimit.
Qelqi është i ngurtë dhe rezistent, nuk çliron substanca toksike dhe nuk lejon depërtimin e baktereve, për shkak të sipërfaqes jo poroze. Ai përballon si temperaturat e larta ashtu edhe ato të ulëta dhe është 100% i riciklueshëm, duke e bërë miqësor me mjedisin. Megjithatë, është i rëndë dhe mund të thyhet lehtë.
Plastika është e lehtë, praktike dhe ekonomike, por më pak e sigurt në krahasim me qelqin. Ajo mund të lejojë depërtimin e ushqimeve të lëngshme dhe në temperatura të larta mund të çlirojë substanca të dëmshme, ndaj duhet përdorur me kujdes, sidomos në mikrovalë. Po ashtu, ka ndikim të madh në ndotjen e mjedisit për shkak të riciklimit të kufizuar.
Çeliku është material shumë rezistent, i ripërdorshëm dhe i riciklueshëm. Nuk është poroz dhe ruan mirë vlerat ushqimore, duke mbrojtur ushqimin nga drita dhe ndryshimet e temperaturës. Ai është i përshtatshëm për të gjitha llojet e ushqimeve, por shpesh është më i rëndë dhe më i shtrenjtë.
