Presidentja e Kosovës, Vjosa Osmani, ka nisur procedurën për emërimin e përbërjes së re të Komisioni Qendror i Zgjedhjeve (KQZ), duke u kërkuar subjekteve politike që të dërgojnë propozimet për anëtarë brenda afatit ligjor prej shtatë ditësh.
Afati për dorëzimin e emrave përfundon më 15 mars, ndërsa emërimi i anëtarëve duhet të bëhet deri më 20 mars.
Përbërja e re e KQZ-së pritet të reflektojë rezultatet e zgjedhjeve parlamentare të mbajtura më 28 dhjetor 2025. Sipas këtij rezultati, gjashtë anëtarë do të emërohen nga subjektet politike shqiptare – dy nga Lëvizja Vetëvendosje, dy nga Partia Demokratike e Kosovës, dhe nga një nga Lidhja Demokratike e Kosovës dhe Aleanca për Ardhmërinë e Kosovës. Katër anëtarë të tjerë do të përfaqësojnë komunitetet pakicë.
Ndërkohë, organizata Demokracia në Veprim (DnV) ka kërkuar që procesi i emërimit të përbërjes së re të përfundojë sa më shpejt, duke theksuar rëndësinë e funksionalizimit të institucioneve zgjedhore në një kohë kur vendi mund të përballet me zgjedhje të parakohshme pas shpërndarjes së Kuvendit.
Deri më tani, Lidhja Demokratike e Kosovës dhe Aleanca për Ardhmërinë e Kosovës kanë propozuar sërish anëtarët aktualë, Sami Hamiti dhe Muharrem Nitaj. Ndërsa Lëvizja Vetëvendosje dhe Partia Demokratike e Kosovës ende nuk kanë dërguar zyrtarisht propozimet e tyre.
Sipas ligjit për zgjedhjet, disa nga anëtarët aktualë të KQZ-së nuk mund të riemërohen, pasi kanë arritur kufirin maksimal të mandateve të njëpasnjëshme.
