Në Kosovë, mijëra ankesa vit pas viti adresohen nga konsumatorët për produkte ushqimore jo të sigurta që shiten në treg. Inspektorati i Tregut po mbikëqyr bizneset, ndërsa Ministria e Industrisë ka ndërmarrë veprime për forcimin e mekanizmave të mbrojtjes së të drejtave të konsumatorëve, u tha në tryezën e diskutimit “Produkte të sigurta, konsumatorë konfidentë”.
Ministrja e Industrisë, Mimoza Kusari-Lila, tha se rritja e 3,200 ankesave vitin e kaluar reflekton ndërgjegjësimin e qytetarëve për të kërkuar të drejtën e tyre dhe se ministria do të vazhdojë përpjekjet për forcimin e mekanizmave mbrojtës.
Nijazi Shala, udhëheqës i Departamentit për Mbrojtjen e Konsumatorit, theksoi rëndësinë e sigurisë së produkteve dhe informacionit të dhënë mbi to, duke përmendur se vitin e kaluar janë trajtuar mbi 200 ankesa lidhur me datat e skadencave. Ai u bëri thirrje konsumatorëve të jenë të kujdesshëm gjatë blerjes së produkteve.
Përveç ushqimeve, edhe produkte të tjera, si lodrat për fëmijë, janë ndaluar disa herë në treg për shkak të rrezikut për shëndetin e fëmijëve.
