Djegiet janë ndër aksidentet më të shpeshta që ndodhin në kuzhinë, por edhe në ambiente të tjera të përditshme si zyra apo plazhi, duke shkaktuar dhimbje dhe shqetësim të menjëhershëm.
Ato ndahen në tre kategori: djegie të gradës së parë, të dytë dhe të tretë. Djegiet e gradës së parë prekin vetëm shtresën e jashtme të lëkurës dhe shoqërohen me skuqje, dhimbje dhe enjtje. Djegiet e gradës së dytë depërtojnë më thellë, duke prekur edhe shtresën e poshtme të lëkurës dhe shpesh shoqërohen me flluska.
Ndërsa djegiet e gradës së tretë janë më seriozet, duke dëmtuar shtresa të thella të lëkurës dhe duke shkaktuar humbje të ndjeshmërisë në zonën e prekur.
Ekspertët rekomandojnë që menjëherë pas një djegieje, zona e prekur të mbahet nën ujë të ftohtë për të paktën pesë minuta. Megjithatë, ata theksojnë se përdorimi i akullit apo ujit me akull duhet shmangur plotësisht.
Sipas tyre, akulli mund të dëmtojë më tej indet dhe qelizat e lëkurës, duke shkaktuar një dëmtim të ngjashëm me djegien vetë. Pas ftohjes fillestare, zona mund të pastrohet dhe të trajtohet me krem antibiotik.
Në rastet kur formohen flluska, ato nuk duhet të çahen, pasi rritet rreziku i infeksionit. Për lehtësimin e dhimbjes dhe inflamacionit, mund të përdoren medikamente si ibuprofeni, gjithmonë sipas rekomandimit mjekësor.
