Karabinierët italianë dhe ushtarët çekë të Njësisë së Specializuar Shumëkombëshe (MSU), pjesë e misionit të KFOR, kanë zhvilluar stërvitje me helikopterë në Camp Film City në Prishtinë, me qëllim rritjen e gatishmërisë operacionale dhe forcimin e koordinimit mes mjeteve ajrore dhe personelit tokësor.
Stërvitjet u fokusuan në transportin e personelit, evakuimin e të lënduarve dhe skenarë emergjentë. Përmes këtyre aktiviteteve, forcat e KFOR synojnë të ruajnë gatishmërinë dhe ndërgjegjësimin situativ, duke mbështetur angazhimin e tyre për garantimin e një mjedisi të sigurt dhe stabil në Kosovë nën drejtimin e NATO.
