Pas përfundimit të edicionit të pestë të “Big Brother VIP Albania”, raporti mes finalistëve Selin Bollati dhe Miri Westside Family ka rikthyer vëmendjen e publikut.
Selini, e cila u shpall fituese e këtij edicioni, gjatë një interviste në emisionin “Pushime On Top” foli për përvojën e saj në shtëpinë më të famshme në Shqipëri, duke kujtuar momentet më të rëndësishme të rrugëtimit të saj.
Pak kohë pas intervistës, Miri publikoi në rrjetet sociale një mesazh që u interpretua nga ndjekësit si një reagim i mundshëm ndaj deklaratave të saj.
“Nëse dhelpra nuk e arrin rrushin, thotë se është i prishur. Thuajeni me zë të lartë se kush ju çoi në finale, nuk është turp”, shkroi ai, duke mos përmendur asnjë emër.
Edhe pse këngëtari nuk ka sqaruar se kujt i është drejtuar, mesazhi u lidh menjëherë me zhvillimet e fundit mes tij dhe Selinit, për shkak të historisë së tyre gjatë garës.
Dy finalistët fillimisht kishin një raport të afërt brenda shtëpisë, por me kalimin e javëve marrëdhënia e tyre u shoqërua me përplasje dhe debate. Në finalen e madhe, Selini triumfoi duke marrë vendin e parë, ndërsa Miri u rendit i dyti.
Reagimi i fundit i Mirit ka rikthyer diskutimet për raportin mes dy finalistëve, megjithëse mbetet e paqartë nëse mesazhi kishte një adresë të caktuar.
