Çmimet e naftës ranë në nivelin më të ulët në dy javët e fundit të martën, pasi Izraeli pranoi planin e presidentit amerikan Donald Trump për armëpushim me Iranin. Nafta Brent ra me 3.82 dollarë, ose 5.3%, në 67.66 dollarë për fuçi, ndërsa nafta amerikane WTI u ul me 3.75 dollarë, ose 5.5%, në 64.76 dollarë, sipas Reuters.
Kryeministri izraelit, Benjamin Netanyahu, konfirmoi marrëveshjen për armëpushim, ndërsa Trump tha se Irani do ta ndalë menjëherë ofensivën, dhe Izraeli do t’i bashkohet pas 12 orësh. Nëse marrëveshja respektohet, luftimet do të përfundojnë brenda 24 orësh, duke i dhënë fund konfliktit 12-ditor.
Si prodhues i tretë më i madh i naftës në OPEC, armëpushimi do t’i mundësojë Iranit rritjen e eksporteve dhe stabilizimin e tregut, duke ndikuar në uljen e çmimeve që ishin rritur për shkak të tensioneve.
