Lidhja Demokratike e Kosovës u ka bërë thirrje bashkatdhetarëve që jetojnë jashtë vendit të përfundojnë sa më shpejt procesin e regjistrimit për votim, duke kujtuar se afati përfundon më 17 maj.
Sipas njoftimit të partisë, mërgata ka edhe pak ditë kohë për t’u regjistruar si votues, ndërsa qytetarët që hasin vështirësi apo paqartësi gjatë aplikimit mund të kontaktojnë përfaqësuesit e LDK-së në degët e saj në diasporë.
Në thirrjen e saj, LDK ka theksuar rëndësinë e pjesëmarrjes së diasporës në proceset zgjedhore në Kosovë dhe ka inkurajuar bashkatdhetarët që të mos e humbin afatin e regjistrimit.
Procesi i regjistrimit të votuesve nga diaspora konsiderohet një nga fazat kryesore para zgjedhjeve, ndërsa institucionet dhe subjektet politike vazhdojnë apelin për pjesëmarrje sa më të lartë të qytetarëve që jetojnë jashtë vendit.
