Një numër i madh të rinjsh kanë marrë pjesë në një ngjitje të veçantë në majën më të lartë të Kosovës, Gjeravicë, duke krijuar një pamje të rrallë dhe një moment historik në bjeshkë. Plot 273 pjesëmarrës, të organizuar nga klubi alpin PBA Peak Bound, kanë realizuar ngjitjen gjatë natës së së dielës, duke shënuar numrin më të madh të pjesëmarrësve ndonjëherë në këtë aktivitet.
Sipas organizatorëve, përveç aspektit sportiv dhe aventurës, ngjitja kishte edhe një mesazh simbolik, pasi u kushtohej ish-krerëve të Ushtrisë Çlirimtare të Kosovës që po mbahen në Hagë. Ata theksuan se rrugëtimi ishte i mbushur me emocione, energji dhe respekt për sakrificën e të kaluarës.
Për sigurinë dhe mbarëvajtjen e grupit të madh u angazhua një ekip i veçantë organizatorësh dhe udhëheqësish, të cilët u vlerësuan për përkushtimin e tyre gjatë gjithë aktivitetit. Në fund, organizatorët e cilësuan këtë ngjitje si dëshmi të fuqisë së rinisë për t’u bashkuar në aktivitete që promovojnë natyrën, sportin dhe solidaritetin.
