Behgjet Pacolli ka reaguar pas rikthimit të kompanisë Mabco në kantierin e Aeroporti i Vlorës, duke pretenduar se objekti është gjetur në gjendje të dëmtuar rëndë pas pesë javësh nga ajo që ai e quan “sekuestrim i paligjshëm dhe i dhunshëm” i terminalit.
Sipas Pacollit, gjatë inspektimit në terren janë konstatuar dëmtime të shumta në pajisje dhe infrastrukturë, përfshirë monitorë, dyer automatike, sisteme elektrike, gjeneratorë dhe materiale të tjera teknike. Ai shton se një pjesë e pajisjeve rezultojnë të zhdukura.
Pacolli i ka bërë thirrje Prokurorisë së Posaçme (SPAK) dhe institucioneve kompetente që të nisin hetime të plota për rastin. Pavarësisht dëmeve të pretenduara dhe pengesave në kantier, ai thekson se puna për përfundimin e aeroportit do të vazhdojë.
