Prokuroria Themelore në Gjakovë ka ngritur aktakuzë ndaj S.M. për veprat penale “Vrasje e rëndë në tentativë” dhe “Mbajtje në pronësi, kontroll ose posedim të paautorizuar të armëve”, lidhur me të shtënat ndaj një autobusi në fshatin Pagarushë të Malishevës.
Sipas aktakuzës, më 11 qershor 2026, pas një mosmarrëveshjeje për linjën e autobusëve, i pandehuri dyshohet se bllokoi rrugën me traktor dhe më pas shtiu disa herë me një armë automatike AK-47 në drejtim të autobusit. Nga të shtënat u dëmtua autobusi, ndërsa jeta e personave brenda u rrezikua, por pa të lënduar.
Prokuroria njofton se arma dhe municioni janë sekuestruar në vendin e ngjarjes dhe i ka propozuar gjykatës që, pas shqyrtimit të çështjes, ta shpallë fajtor të pandehurin dhe ta dënojë sipas ligjit.
