Zëdhënësja e Shtëpisë së Bardhë, Karoline Leavitt, ka hedhur poshtë raportimet se SHBA ka kërkuar zyrtarisht zgjatjen e marrëveshjes dyjavore të armëpushimit me Iranin.
Ajo i cilësoi këto raportime si të pasakta, duke theksuar se Uashingtoni mbetet i angazhuar në negociatat dhe se bisedimet po vazhdojnë në mënyrë produktive.
Leavitt tha se, sipas saj, administrata amerikane ka një ndjesi pozitive për mundësinë e arritjes së një marrëveshjeje, ndërsa konfirmoi se diskutimet janë ende në zhvillim.
E pyetur për raundin e ardhshëm të bisedimeve, ajo u shpreh se ka gjasa që ato të zhvillohen në të njëjtin vend si takimi i mëparshëm, pa dhënë detaje të tjera.
