Djegiet janë ndër aksidentet më të shpeshta në kuzhinë, punë apo edhe gjatë aktiviteteve të përditshme, dhe shoqërohen me dhimbje, skuqje dhe në raste më të rënda edhe dëmtime të thella të lëkurës.
Ato ndahen në tre shkallë: djegie e gradës së parë, të dytë dhe të tretë.
Grada e parë prek vetëm shtresën e jashtme të lëkurës dhe shkakton skuqje e dhimbje.
Grada e dytë përfshin edhe shtresat më të thella dhe shpesh shoqërohet me flluska.
Grada e tretë është më e rënda, duke dëmtuar indet e thella dhe duke shkaktuar humbje të ndjeshmërisë në zonën e prekur.
Ekspertët këshillojnë që në rast djegieje, hapi i parë të jetë mbajtja e zonës së prekur nën ujë të ftohtë për disa minuta. Megjithatë, ata paralajmërojnë se akulli apo uji me akull nuk duhet të përdoren në asnjë rast, pasi mund të dëmtojnë më tej indet dhe qelizat e lëkurës, duke e përkeqësuar gjendjen.
Pas ftohjes së zonës, rekomandohet pastrimi i lehtë dhe përdorimi i një kremi antibiotik. Në rast të formimit të flluskave, ato nuk duhet të shpohen, pasi rritet rreziku i infeksionit.
Për lehtësimin e dhimbjes, mund të përdoren ilaçe kundër inflamacionit si ibuprofeni, gjithmonë sipas udhëzimeve të mjekut ose farmacistit.
