Deputeti i PDK-së, Artan Behrami, ka reaguar ndaj deklaratave të deputetit të Vetëvendosjes, Adnan Rrustemi, për gjykimet në mungesë për krimet e luftës dhe gjetjen e personave të zhdukur në veri të Kosovës.
Behrami ka vlerësuar se Rrustemi ka korrigjuar një deklaratë të koleges së tij, Arbëresha Kryeziu Hyseni, lidhur me kohën kur janë krijuar bazat ligjore për gjykimet në mungesë.
Megjithatë, ai e ka kundërshtuar pretendimin se Vetëvendosje ka rol në gjetjen e trupave në veri. Sipas Behramit, këtë punë e kanë kryer institucionet e sigurisë dhe drejtësisë, përfshirë Policinë e Kosovës, AKI-në dhe prokurorët.
Ai ka akuzuar Vetëvendosjen se po përpiqet t’i atribuojë vetes rezultatet e institucioneve që, sipas tij, kanë ekzistuar edhe para ardhjes së kësaj partie në pushtet.
Në fund, Behrami ka ironizuar Rrustemin duke thënë se e gëzon fakti që, sipas tij, gjithnjë e më shumë kuadro të PDK-së po marrin pozita të rëndësishme brenda Vetëvendosjes.
