Kryetarja e Kuvendit të Kosovës, Albulena Haxhiu, ka përkujtuar viktimat e masakrave në Krushë të Madhe dhe Krushë të Vogël, duke theksuar se plagët e këtyre ngjarjeve mbeten ende të hapura edhe pas 27 vitesh.
Ajo rikujtoi se gjatë këtyre masakrave u vranë qindra civilë të pafajshëm brenda një kohe shumë të shkurtër. Sipas saj, 354 civilë të paarmatosur humbën jetën, ndërsa 124 persona u zhdukën me dhunë dhe ende nuk janë gjetur.
Haxhiu bëri të ditur gjithashtu se një nga viktimat e zhdukura, Ajvaz Shehu, i cili ishte vetëm 15 vjeç në kohën e luftës, është kthyer për t’u rivarrosur me dinjitet në vendlindjen e tij. Ajo theksoi se ky kthim sjell lehtësim për familjen, por njëkohësisht rikujton se shumë raste mbeten ende të pazgjidhura.
Duke folur për përgjegjësinë institucionale, ajo theksoi se Kosova do të vazhdojë të kërkojë drejtësi për krimet e kryera gjatë luftës dhe do të ruajë kujtimin e viktimave si pjesë të historisë dhe sakrificës për liri.
