Rahoveci 029 ka arritur një fitore jetike në udhëtim ndaj Golden Eagle Ylli, duke siguruar mbetjen në Superligën e Kosovës në basketboll.
Skuadra nga Rahoveci triumfoi pas vazhdimeve me rezultat 89:83, në një përballje tejet dramatike që u vendos vetëm pas pesë minutave shtesë. Koha e rregullt përfundoi baras 75:75, ndërsa në vazhdime mysafirët u treguan më të saktë, duke realizuar 14 pikë kundrejt tetë të vendasve.
Ylli e nisi më mirë ndeshjen, duke dominuar çerekun e parë. Pas një pjese të parë të balancuar, Rahoveci reagoi fuqishëm në çerekun e tretë, ku bëri kthesë të madhe me rezultat 33:20. Çereku i katërt ishte i tensionuar dhe pa fitues, duke çuar sfidën në vazhdime.
Në momentet vendimtare, rahovecasit treguan më shumë qetësi dhe efikasitet, duke siguruar një fitore që u garanton pozitën e shtatë dhe mbijetesën në elitë.
Ndërkohë, pavarësisht fitores në xhiron e fundit ndaj KB Peja, KB Vëllaznimi nuk arriti të shmangë rënien nga Superliga, duke përfunduar në vendin e tetë.
Sezonin e rregullt në vendin e gjashtë e mbylli KB Sigal Prishtina, ndërsa Rahoveci 029 përfundoi i shtati.
