Shtatë persona të nacionalitetit serb janë arrestuar të martën nga autoritetet kosovare në Graçanicë, nën dyshimet për kërcënime, presion dhe shantazh ndaj vullnetit të lirë të votuesve, në prag të zgjedhjeve të parakohshme parlamentare të 7 qershorit 2026.
Lidhur me rastin, kryeministri në detyrë Albin Kurti ka deklaruar se Serbia po ushtron presion të vazhdueshëm ndaj serbëve të Kosovës, duke synuar, sipas tij, imponimin e votës për Listën Serbe.
Ai tha se kjo situatë përbën një formë presioni që, sipas tij, është bërë më e theksuar gjatë periudhës së tij në detyrë.
“Ka pasur shumë ankesa nga vetë serbët e Kosovës për presione dhe shantazhe që i detyrojnë të votojnë Listën Serbe. Ky fenomen ka marrë përmasa të mëdha dhe është alarmues”, ka thënë Kurti.
Ai shtoi se Serbia vazhdon të përpiqet të krijojë struktura dhe ndikim brenda territorit të Kosovës, të cilat sipas tij janë veprime ilegale në një shtet të pavarur.
