Prokurorët në SHBA kanë deklaruar se në librin e ish-këshilltarit për siguri kombëtare, John Bolton, nuk është publikuar asnjë informacion i klasifikuar. Sipas tyre, çështja penale nuk lidhet me përmbajtjen e librit, por me shënime që ai dyshohet se i ka ndarë me familjarët e tij.
Në dokumente gjyqësore thuhet se Bolton, gjatë dërgimit të materialeve, u kishte shkruar familjarëve “Për asgjë nga këto nuk flasim!”, ndërsa një prej tyre ishte përgjigjur “Shhhh”.
Bolton, 77 vjeç, u deklarua fajtor për një pikë të vetme të akuzës për mbajtje të paligjshme të informacionit të klasifikuar gjatë një seance në një gjykatë federale në Maryland. Ai shprehu keqardhje për veprimin e tij.
Marrëveshja me Departamentin e Drejtësisë mund t’i mundësojë shmangien e burgut, ndërsa vendimi përfundimtar pritet të merret më 28 tetor. Sipas marrëveshjes, çdo dënim me burg nuk duhet të kalojë pesë vjet, ndërsa parashihet edhe një gjobë prej 2.25 milionë dollarësh.
Bolton ishte akuzuar fillimisht për 18 vepra penale lidhur me trajtimin e informacionit të klasifikuar dhe më herët kishte deklaruar pafajësinë. Ai ka qenë ish-këshilltar për siguri kombëtare në administratën e parë të Donald Trumpit dhe autor i librit kritik “The Room Where It Happened”.
