Sot shënohet 27-vjetori i fillimit të sulmeve ajrore të NATO-s ndaj caqeve ushtarake dhe policore serbe në ish-Jugosllavi, një ndërhyrje që synonte ndalimin e dhunës dhe krizës humanitare në Kosovë.
Fushata ajrore e Aleancës Veri-Atlantike nisi më 24 mars 1999 dhe konsiderohet si një moment kyç në zhvillimet që çuan drejt përfundimit të luftës në Kosovë.
Ndërhyrja e NATO-s ndikoi edhe në kthimin e mbi 800 mijë refugjatëve dhe personave të zhvendosur, brenda dhe jashtë Kosovës.
Më 12 qershor 1999 filloi vendosja e trupave paqeruajtëse në Kosovë, ku rreth 50 mijë ushtarë nga 36 vende të botës u angazhuan në garantimin e sigurisë dhe stabilitetit.
Sot, 27 vjet pas ndërhyrjes, misioni i KFOR-it vazhdon me një prani më të reduktuar, i përqendruar në ruajtjen e paqes dhe sigurisë në vend.
Ndërkohë, NATO mbetet e angazhuar në përballimin e sfidave të reja globale, përfshirë sigurinë kibernetike dhe krizat ndërkombëtare.
